الحب الطالع الفوق

الكاتب: محمد لعصايب

الحبْ الطالعْ الفوقْ..

الحب نَبضْ مخفوق

ڨالها الڨلْب ملّي شاُفه نازلْ ..

منْ راسْ الجبلْ

طالعْ هْواه من تحتْ الفوقْ

يتحدًّى نفسُه.. و ما يَتْنازلْ..

يتسلًّقْ الصّْخرْ بلا حْبَلْ

تابعْ عْنادْ الشُّوقْ

الشّوفًه منُّه طُرقانْ تَتْعازلْ..

فْ سِحرْ شَلَّالْ تَنْغازلْ..

كونْ ما جرَّبْ الطَّيْحَه فْ طْلوعُه

واخَّ جابها فْ ضْلوعُه..

كانْ يَتْخَوْرَجْ عقلُه و يهبَلْ.

الحُب عاشقْ و معشوقْ..

يناورْ فْ كلّْ الاتجاهاتْ..

يزغّْرَتْ من اعماقُه آهاتْ

يْنَغْزُه سُؤالْ الفْضولْ

يَتعر"َى من احْزانُه..

يلبَسْ ألوانْ الفْصولْ

فْ عينُه سَرّْ يحجبْ الشَّهوَه..

فْ عينُه سَفَرْ سِندبادْ..

تعانقْ أنفاسُه امْواجْ..

و ما زالْ هُوَ هُوَ..

عُذْري الدُّوَّارْ

ما زالْ يفاڨـدْ و يْسالْ..

على احْبابُه بْ مَرْسالْ..

ما زالْ سيرَةْ مَلامحُه  شمسْ ما تذْبالْ.

الحُب فْ زْمانّا..

بْحالْ شي دَرِّي صْغيرْ

تَنْمايلْ أحاسيسُه..

فْ كفْ عفريتْ

يلعبْ غُمَيّْضَةْ هْواهْ..

فْ كُلْ طْلَيْلَه يْغيرْ

يجري وْرا(ء) خْيالُه..

و يڨـولْ ما جْريتْ.

.....

......