الكاتب: سعيد با الزين جيداني
بريات ميّت
(1)
أنا براني فيّ
التراب على ترابو غاب
جخ...
الريح فيه تنفخ
و هاد الروح ماشي ديالو
أنا شوية من والو
دزت مطرّف على "الحياة"
يا حياة ...
تعالي نصفوا...
آش تتسال؟؟؟
ورٌي لحسابي وجهو ف مراية حسابك
خلي ترابي يرتاح
يرجع التراب
هاكي لكل نجمة....
القبر
هاكي الصبر باقي مسوفلي
هاكي الضفر والف يهبش
هاكي الأصباع وصلت السطاج اللخر ف "لعبةالحنش"
هاكي خاطر فين تسرحي رجليك
هاكي شوفة فازگة دموع
Amoled
ف لون الكيّات
هاكي لسان باقي ب ميكتو
هاكي قلب خدام من نيتو
هاكي عفطة ف الشك
خلاها مولاها ف وجه الگمرة
هاكي تنهيدة حايلة من قاع الجرح
هاكي كسدة هادشي اللي شاط فيها
هاكي روح ياك الله اللي عالم بها
هاكي أيامي معاودة
خايبة ف تعاويد
هاكي ورث جاني منو عويد
هاكي خطواتي على قياس الكبل
و
عطيني...
حتى تعطيني...
عطيني...
شكل آخر منك ف شي شكل
عطيني...
غ...
عطيني ع الله شي قصيدة ميتا...فيرس
........
