الكاتب: محمد موتنا السباعي
الـصـوره الـهـربـانـه ..
طال الحال بيني و بين الحلم
حتى نسيت وجه الحلم ك داير
وليت مره مره نتخيل ليه صوره
ملى نجي نجمعها ف عقلي
نلقاها جمله مبتوره
حضر فيها المبتدا لكن خطاها الخبر
و خطاها المعنى و تخربق فيها التعبير
و ليت نقصد لقصيده
عسى الخيال يسعف
و ما يبقاشي يتعسف
يحرر القلب ساعه من قطيع لياس تحرير
وليت نكول يمكن يمكن
طيف الحلم يتمكن
واخ غير ف تشبيه و ل ف استعاره
تجيني منه اشاره
نشوف خياله كدام العين يسير
هاكدا ملى نيست من الحلم
صرت ف لقصيده نسجل غيابه
نزيد حرف على حرف
حتى فاض كتابه
كلما جيت نقراه نكول ياه ياه ياه
داز لعمر ف الرجا
و احنا شي ما شفناه
ما بقى لينا حق
ف شي حلم يتحقق
صرنا راضين منه بصوره
يكون فيها يا غاشي ماشي
يا عايم ف بحر
يا ف السما طاير..
........
محمد موتنا السباعي
