الكاتب: عمر نفيسي
تهلا فكاسك وانسى لي جفاك
هذ الخد ولف يتوسد هذ الكف
يساعف هبالي ف التخمام
يزمم الكيات
يرمم شضيات الخاطر
باش نعلق عليها صورة بلا كادر
رسمتها بلا ريشة بلا قلم
الغدر ، لقيته شناق ف سوق الحيلة يحتج
سرف على طوقي
هجج عروقي
عنفج رشوقي
قج وما رخف
وعنداك تحسبوني نشطح
هداك ع حر الموس
لي حفحف وما ارحم
الموت شربت دم المغدور
وحر ساعة يفوت
ودوك الخوت
تشفاو فالفرحة
وبين الخطوات سال خيط الشهوة
ودارها المبارك ولمزغوب فيها تقدم (g)
ندي ونجيب ف الطرقان ياودي
نير ونسدي
وايلا خطيت هاني ساير نودي
وهذا وعدي
البارح كنت داك الطير الحر
واليوم نشطح على ايقاع مشطة وقدم (g)
ٱندب سعدي .
بمخالب الكلمة
ومال هذ الهبال عاد عندي حلمة
غادي على الشوك ندك ونزطم
مخيبك بطبيعة يا لقصيدة
خنقتي فيا التنهيدة
انسيتي الرفاقة (g)
وشحال بينت ليك من الحداقة (g)
لي شاهد عليها الحماق ولهبال
و الليل وماطال
والحال ملي تزهر نار الجدبة
ويعود الدق تم .
كان عليك ...
كان عليك تلقمي من لي فات
وتفكري دوك الآهات
ملي ترعد وتزبد ديك الذات
وتكوني قصيدة وحيدة
وانا شاعر نبني ونهدم .
ياك أنا لي اكبر همي فحشاك
وبكيتي
وبكيت معاك
وبمنجج النخوة ناولت غطاك
وغطيت العيب
واسيتك و(g)قلت ماشكماك
وسولفت شعور الهم
التف عليك أراسي
بالخف كتيق
واش العقرب (g) تسقيك رحيق
و لارفيق لغدر ينجم معاك طريق
بلاش عليك تندم أراسي
اتهلى فكاسي
وانا نتهلى فيك
وانسى لي جفاك بالراحة تنعم
اتهلى فكاسك
واطرد وسواسك
والى مشات قصيدة تجيك قصيدة
ياك انت الشاعر
وانت الحاضر
وانت الظاهر
وانت القلم لي يزمم
انت مال بوك ياقصيدة
ما تفهمي فحروف الزين
ولا فطولة وتجريدة
ما تفهمي ف الخط
ملي يطلع ويهبط
ويرسم شوفة العين
تكلم الحر وبالغمزة يفهم .
أنت مال بوك يالقصيدة
حالك حال السلوقي ملي تنوض الصيدة
الجعبة عامرة
والرامي ناضي
وهو مشى قاضي حاجة ..
حاشى سيادي
الى عابو ألفاضي وما عرفتش نتكلم .
.....
.....
