الكاتب: أمين زغنون
لمْعاني فيا
لمْعاني فيا
زنقة قاعية
و سَادَّة الدفوف
مدَرْڭة ف سجية
مخَبْيَة عليا
و حالفة ب حلوف
تتعامى ف الشوف
تتهامى ف الجوف
ف رشوقها
تُخْرُج حروف
تڭول عل الولفية
يغني لڭليب ملهوف
بالوجد الّي سارح فيا
على الّي ف تبسيمتها
الزين موصوف
ف نضام الملحون
جوهر مصفوف
ملحة و سر
و حروف
شمعة تبكي
خلخال يشكي
حرَّاز يحكي
على ورد من لخدود
مقطوف...
على اللّي ف تكليمتها
تساوات العيطة
موازن و صروف
صَدْعة توَسْدَت راغول
و قوس كي الطاوس يجول
بين عبدة و احمر
كاب خيول على خيول
و المرفودة بالعادة
للكريدة لالة حادة
و الراضة الراضة
خربوشة جايا تشالي
رجاها ف العالي
تغَوَّت بالعلالي
حاجتها ل ڭرينها ف الليالي
يڭَعَّد لعلام
يبَلَّغ السلام
شي حاجة بحال لكلام...
لأم هاني...
اللي بعيوطها مازال تطوف.
لمعاني فيا
زنقة قاعية
و سادة الدفوف
مدرڭة ف سجية
مخبية عليا
و حالفةبحلوف
ف ضيقها
تطعن سيوف
ف دواخلي مخفية
ترُدْ الليل
مَجْبَدْ طويل
و عَلاَّمو ف ضلامو
مكفوف
عَوْدُو عُودْ ڭليل
مقامو ف السربة
معيوف
بارودو دموع تسيل
و التخريجة ف ڭلبي
المسكـوف...
و النهار...
ويل ويل
همُّو يسرح همِّي
و المسرح دمِّي
يتْسَرْسَب ف شقوق التنهاد
يتْدَرْدَب ف لعروق مداد
و السَّارح وَدَّر لڭياد
و المسروح نتَّڭ لوتاد
و المجروح ڭلبي الوڭاد
حيت ديما ك يفهم
و عند اهل لكياسة
معروف...
لمعاني فيا
زنقة قاعية
و سادة الدفوف
مدرڭة ف سجية
مخبية عليا
و حالفة
بحلوف
ف اشواقها
تململ حباقها
يعطي ريحتك
نْسِيمة رْطَيْبَة ف الروح
كْليمة تتهجَّى ف البوح
ضلَيْمَة تترجى مشبوح
و شْوِيفة شافية
ب عينيك تروف
ايلا التيساع ف لخاطر
عاد مكـروف
لمعاني فيا
زنقة قاعية
و سادة الدفووف
مدرڭة ف اسجية
مخبية عليا
و حالفة
بحلـوف
ف حمـاقها
تخربق زواقها
تفرشو للنجوم ليلات
ترُشُّو ف الشموس ڭيلات
ف وراقها
تتفكرو ايلا نسات
و تساويه
ايلا عقلات
رشقة ف التصفاڭ
احلات
ايلا بالعطفة
تلاطمت شي
كفوف.
لمعاني فيا ...من ديوان : لِيلْ و مْقالْ
.....
.....
