نظرة

الكاتب: أحمد السالمي

نظرة

نَظْرَة... !

ڭَـلَڭْـلَتْ ف عيني .. صَحرا..

واخّا سْماها عامَر ضْبابْ..

واخّا حَطّْ رْحَالو سْرابْ..

ما طفى منْ عـطَشْها رَمْلَة

ما خَفَّـفْ من رَعـشْتي نَزْلَة

ياكْ قيس بْكى حْياتو..

منْ العينْ عَـشْرَة...

ما سْقى بَ بْكاهْ قْـبَر لَيْلى...

ما قْـتَلْ منْ مْحايْنو حَسْرَة...

يَمْكَنْ الجُوْ يَهْـمَدْ..

يمكن حَرَنْتو تَبْـرَدْ

مَلّي فَبْرايَر يَكْمَلْ شَـهْرو..... !

نظرة.... !

تَـدّي وتْجيبْ فَحْياتي بْ مَـرَّة..

ڭَـلَّبْ وْراقْها كْـتابْ..

حَس بَ حروفْها..

مَلّي تْـلينْ..

رُدّْ بالَكْ مْعَ اللي يَصلابْ..

فْهَـمْها وْحَمْ..

ما تْقاوْمو غير الفَحلَة..

فْهَـمْها عَنْتَر تَّظْـلَمْ..

فْهَـمْها عَـشْقْ شوقي لْ زَحلَة..

يَمكنْ حَرّْهَا يَنْفَـذْ..

يمكن منْ بيرها تَجْبَدْ..

مَلّي جْوادْها يْغيبو ويْحَضْرو..... !

.....

.....