الكاتب: ميمون الغازي
صلّى عليك الورد
حتى ثلج ما شبه بياضك
ولا شمس عاندت شروق الخد
تحزن الحديقة لغيابك
وإلى طل ظلك
يتفتح الورد
الى ساح بھاك
شرق بالطول و العرض
انطق الزين
ب وجنات خوخية
ذاب الشھد
وعلى شفايف وردية
تدفق لعسل
فاض
حتى ماعرفتلو لحلاوة حد
******
دق القلب باب الجنّة
يتوجّع، آدم
وجع بنين
يا تفّاح المحنة
الشّوف
ما يطفي جهنّم
ف جوف
لكن
زوينة ھاذ الوحلة
زوينة ھاذ الحصلة
واسعة ھاذ المعنى
…
باش نطير ليك
معدوم الجناح
مسكين
عايم ب خيالي
سارح ف كون
كواكب ونجوم
انت روحھا انت سماھا
فراشات بألف لون و لون
مجرات ماتت فيھا الحياة
انت بحورھا شموسھا و قمارھا
…
حلّق يا زين
فين؟
حلّق
ھنا.. الھيه..
العب.. دق دق
كمنجة وتعريجة
بندير و تفريجة
نغمة تغازل نغمة
نغمة تغزل نغمة
حرف يحك حرف
كلمة تفك كلمة
تشعل مقام لھبال
ھنا طاح اللويز .. ھنا اللعبو عليه
ھنا بان لعزيز .. ھنا نشطحو عليه
تحيّر شعرك
تعرّى سرك
يد اللّه
سوات خصرك
زرعت الرمان ف صدرك
شعشع النھد
و بھشاشة الفراشة
نحتت القد
كوني حواء
كوني حرة
تذبال الأساطير
و يزهر الغد
يرقص عباد الشمس
يبتسم الخلنج
يسجد البابونج
ورد يراقص ورد
ورد يعاند ورد
تتفـرّش ليك الحديقة
زربية
تتكتب ليك القصيدة
نثرية
ورد يمرمد ورد
يغسل الندى
ما فاض من أنانية
ماشاط من أنا.. ف النية
على مقام الخلق
وب سورة البدء
يشھد الحق
كل الحق
حق الحق
و بلا نِسبية
تھمھم المعابد
الكنائس المآذن
ترن تأذن
اللھم أنتِ
تقيم الصلاة الحديقة
و
يصلّي عليك الورد
تسبّح العصافير
حرية حرية
يردد الصدى
حورية حورية
نتعراو ف نشوتنا
نحضرو ف غيبتنا
نغيبو ف حضرتنا
ونحلّو ف الوجد.
.....
.....
