هْنا وْ ... لْهِيهْ

الكاتب: محمد موتنا السباعي

هْنا وْ ..... لْهِيهْ

(بمناسبة فاجعة سيدي رحال)

خَلِّيكْ مَنْ هْنا

لا تْكُونْشْ مَنْ لْهِيهْ

راكْ انْتَ مَنْ هْنا

ما ٱنتاشِي مَنْ لْهِيهْ

راكْ مَخْلُوقْ لْ هْنا

ما مَخْلُوقْ لْ لْهِيهْ

واخَّ تْغِيبْ مَنْ هْنا

وْ تَلْقَى راسَكْ لْهِيهْ

مَحْسُوبْ عْلَى هْنا

ما مَحْسوبْ لْهِيهْ ..

ما مْسَكِّيشْ بْ لَحْلِيبْ

ٱلْبَرّْ ٱلِّلي هْنا

وْ لِيهْ ما يَتْشَهَّى داكْ

ٱلْبَرّْ ٱلِّلي لْهِيهْ

لِيهْ ما يَتْشَهَّاوْ ٱمّالِيهْ

وايِّيييييييهْ !!!

وْ ٱنْتَ ما شِي مَنْ ٱمَّالِيهْ

واخَّ تْبَدَّلْ ٱلسّْمِيَّه

واخَّ تَمْحِي لَكْنِيَه

واخَّ تَنْكَرْ جَدَّكْ

واخَّ تَفْسَخْ جَلْدَكْ وْ تْبِيعِيهْ

واخَّ تَحْرَكْ لَوْراقْ

واخَّ تَحْرَكْ ٱلرّايَه

واخَّ تْكَدَّبْ ٱلْآيَه

وْ تْبيِعْ رُبْعْ ٱلْمَقامْ

وْ تْبيِعْ رَ صْدْ ٱلْعُشّاقْ

وْ تْبَدَّلْ ٱلْمايَه

وْ تْبَدَّلْ ٱلنَّمْرَه

وْ تْبَدَّلْ ٱلنَّظْرَه

وْ تْبَدَّلْ ٱلْهَدْرَه

وْ تْبَدَّلْ ٱلنَّغْمَه وْ تَشْكُرْ ٱلنَّعْمَه

حاسْبِينَكْ مَنْ هْنايا

ما دايْرِينَكْ فْ حْسابْ لْهِيهْ

حِيتْ ٱنْتَ مَنْ هْنا

ما شِي مَنْ ..... لْهِيهْ

.....

.....