الكاتب: ميمون الغازي
قصيدة كتبتها قبل ما نكون
غادي نعصر هذا الصمت
من سكاته
غادي نعصر هذا الصوت
من صلاته
نعصر الوقت
اللي ضحا بحياته
نعصر اللحظة ف كاس
كاس واحد من الشك
يديني لليقين
يهرب بدماغي
يدبحني م الوريد
وعلى أمواج دمي
ترقص قناديل البحر
علاش نكتب
لمن نكتب
يمكن نكتب ليا فالغياب
نكتب الْديك اللحظة
فين نلقاني
لما يكنس لعدم غبارنا
و يمسح الموت أثر الخطوات
و قبل الخيال ما يعوم فالوهم
يركب بساط الفانتازيا
و الحس
يتقمص غريزة التعبير
قبل ما نخربش فالورقة
غادي نقرر ما نكتبش
نوقف التفكير
باش ما نكونش
نذبح رحم الكون
نمحي حجرة النرد
نبعثر فوضى الاحتمالات
لون الحروف
على بياض الورقة
أنا هو هذاك
أنا حداك
أنا فيك
أنا معاك
انساني عفاك
انساني
خرجني من جسدي عنواني
دخلني الكان
نكون فكرة
فكرة ف كاس
مشروب روحي
عمّر بيا الراس
خلي الروح تجوب دروب الناي
يعلّم الصمت حكمة الموسيقى
و على إيقاع الموج
يكتب "قنديل البحر" أول قصيدة
ف
زمان خاوي من ضجتنا
ريح
يهدهد حقول خالية من الفزاعات
قبل
ما تتبهدل الحياة
شششششتتتتت
خلي الكائنات تسمع
اصوات اخرى ضاعت فزحمة اليقينات
وثنية طوطمية كنفشيسية زرادشتية بوذية هندوسية
صدى المعابد
همهمات الكائنات
رنين الكنائس
زهد الراهبات
صياح المآدن
حيا على الوفاة
قبل الصمت
قبل الصوت
قبل دقات القلب
قبل الهزة
الخارجة من رحم الوجدان
يكتب "قنديل البحر"
ورقة بيضا
كيف ضوء
كيف قبر
و حقائق الديانات
قبل الوقت ب ظلمه
بعد الوقت ب نجمه
قبل الاكتشاف ب دهشه
قبل ما نكونوا
ف يد الله اللي اعجنّا
و كانت أنفاس الحياة
ورقة شفافة
كيف المساحة للي بيني وبينك
كيف المساحة للي بين المجرات
كيف خيال يجمع الحروف
و يشكل حضوري
صفحة بيضا
نقراو فيها دهشتنا
ما يرضي غرورنا كبريائنا
نقراوا بلا خوف
نقراوا
بداية بلا نهاية
نقراوا فين تحد الكون
نقراوا قربنا
نقراوا بعادنا
لقاءاتنا فراقنا
نقراوا غيابنا فالحضور
حضورنا فالغياب
ففياق صبحاتنا فينا
فقهوتنا فالتزاماتنا فجديتنا
فكسلنا فتركيزنا فضحكنا فعبثنا
فنظام رسمه غيرنا
دجّن شراستنا قص ظفارنا
ستر عرانا و عطانا مفهوم الأخلاق
غادي يكتب "قنديل البحر"
قبل الخطوة الاولى فالأبدية
على شط خاوي من النوارس
يخرج لسان البحر
يلحس الكلمة الكتبة
كلمة انسان
يطرزها باصداف هجرتها الرخويات
يغسل الرذاذ
ما بقى ف الأرض من شياط الأنانيات
من ضحكاتنا المجنونة
من هجرة الفراشات
من دموع الورد
ف حدايق حازنات
من حروبنا .. من دمارنا .. من غطرستنا
جوعنا .. جهلنا ببساطة الحياة
غادي يكتب "قنديل البحر" آخر قصيدة
و بعد ملايين السنين
تخرج قناديل البحر
تشعل النار
تصارع الثيران
تشحذ السيوف
تغذي الحروب
تألف الأساطير
تغزو الفضاء
و تعيد دورة الحياة في كوكب مجهول العنوان
.....
.....
