شفت و شفت

الكاتب: ادريس الهݣار

شفت و شفت

شفت و شفت.. شفت شلا خيال

وتلفت يا أنا ما بين ظل وظلام

.

فبحور الشمتة، شحال من حرف بسال

وشديت على راسي برزة التخمام

.

لساني، يا لساني عمرك ما تثقال

حروفك صفوف تسلم عليك سلام

.

لا تنسى، احفظ القصة و رد البال

رتب القوافي يا أنا نحفظ لكلام

.

انت يا ولدي لا تيق فضريب الفال

احفظ لحساب وعد معاه ليام أليام

.

سعدات هذاك اللي جال وجال

راكب على عودو وشاد اللجام

.

على راسو ترازا وعلى كتفو شال

العود يحنحن، والسربة تالفة فغيام

.

يا هذاك التالف راه بحال بحال

الهضرة لكثيرة كتجيك شلا خصام

.

على ذاك الشوق للي قال وقال

عولت عليه يجمع ما فذيك العرّام

.

زواق غطاتو هاذيك مولات الخال

فظلام شمعة دمعها يسيل غرام

.

شفت و شفت، شفت شلا خيال

وتلفت يا أنا ما بين ظل وظلام

.....

.....                                                                                                                                                                                             

الخميسات ـ26.06.2024