الكاتب: سعيد با الزين جيداني
الكادر
مرة...
مرة
أرسمني لوحة ب الما ف خيالك
منّاقص من الكادر
بلاش منها حتى المناظر
غطسني ف الأكحل
طليني طلية
رش رشات :
من الليموني
گلنا حنا تشيني
شاد الصف...
توصلني النوبة يعدموني
رشة خفيفة :
من الأخضر
لون الملائكة...
لون الشجر
عراه الطبيب جراح
يفتحني...
يسل من جنابي الدغل...
يخيّطني
رشة :
من الأبيض
الأبيض!!!؟
يمكن بلاش؟
على ود أنا و الأبيض
من البدو ما تولمناش
توخّر خطوة...
جوج
گول خطوات
شوف
واش أنا كاين تماك؟
رش الما يمحي الألوان
تبكي لوحتي
ما تبكي لوحتك
نتعاود نترسم
دمعات
يمكن تحيّيني...
و نبان
غطي اللوحة ف خيالك
حوزها للظل
نساها/نساني
يمكن ف الأنتيكة
شي النهار نسوى عند مولاها...
و مرات...
أكتبني ف خاطرك
طلي اللوحة طين
غمس القلم ف صمخ حايل
وأكتبني
قصيدة ...
هم عام گولو انت ف دقيقة
لگطني الطرف ب الطرف
مشرشد ف شلا خيالات
نتقرا دهشات
أكتبني
بريّة ملهوفة
أحفر ليّ ف قرعة قبر
دفنّي متقلب ف الأمواج البحر
أكتبني
البكا ساكت من عين عگرات
...سكات على باب جهدو يغوث
قصة
عركت ف صدر غصة
أكتبني...
حتى نعجبك و محيني
عاود أكتبني
و عاود ب الما أمحيني
نترسم/نتكتب
گطرات/دمعات
ب صمخ الاكحل
ب دمع مهماج
ب أخضر
ب الليموني ...
رش الما(ء)
نحيى من رماد طيني
.....
.....