الكاتب: عبد اللطيف البطل
بْرَيَّة بْلَا عُنْوَانْ
(المقطع الثاني)
.........................
طْرَيَّفْ مَنْ لَحْمَكْ وَدَّعْ
ؤُ مَاتْ،
لَكْدُوبْ مَا اِيكٌـَيَّلْ
فْعَشْ الْمُوتْ،
بَعْدْ وْحَيْدَة
مَنْ ثَلْثْ لِيلَاتْ،
خَبِّيتْ رُوحِي فِي قَاعْ
تَابُوتْ،
لَمْسَة مَنَّكْ قَدْسَتْ
الذَّاتْ،
مَا تْلَاتْ الرَّغْبَة تَلْكٌـَا
سَارُوتْ،
شَرْقَتْ شَمْسِي ؤُ بَلْخَفْ
طْفَاتْ،
ؤُ يَارِيتْ كُوغِي فَاتْ
الْفُوتْ.
فَصْبِيطَارْ اِينِينْ
نْهَارْ ؤُ لِيلْ،
حَاضْيَاهْ رْتِيلَة
مَنُ كُلْ لُقْنَات،
تَدَّلَّیَ بَخْيُوطْ مَفْتُولَة
فْتِيلْ،
طَامْعَة تَشْرُبْ
مَنْ شِي دَمْعَاتْ،
عَقْلِي سَارَحْ فَطْرِيقْ
طْوِيلْ،
هَرْبَانْ لَلْوَهْمْ ؤُ طَنْزْ
الضَّحْكَاتْ،
طَاحَتْ بَكْيَة مَزْقَاتْ
صْقِيلْ،
هَذَا عَزْرِي، زَغَرْتُو
يَا لَبْنَاتْ.
هَذَا مَلَاكْ زِينْ
ؤُ فْطِينْ،
ؤُ هَاذِي شَمْسْ حَاضْيَة
حَيَاةْ،
كِيفَاشْ تَنْبَتْ الرُّوحْ
مَنْ الطِّينْ،
ؤُ تَرْجَعْ لَطِّينْ، تَقْلَبْ
الْخَطْوَاتْ،
مَا كَنْتْ نْبِيعْ جَلْدِي
مَسْكِينْ،
لُوْلَا خْيَالَكْ غَرَّقْ
الْعَثْرَاتْ،
نْخَيَّطْ الْوَقْتْ ؤُ نْرَقـَّعْ
فَسْنِينْ،
نْغَدِّي فَالرُّوحْ بْضَوْ
الشَّمْعَاتْ.
.......
......