الكاتب: منصور لعميري
Tactique
امتى نخرجو من الدائرة لي ترسمات لينا البارح
نخونو شهقة البداية بنهاية حنا نرسمو ليها الملامح
تيبدا كلشي
ملي السكات تيعجو راسو
و يختار لينا موت رحيم
تيبدا كلشي
ملي الكتابة تشوف فينا بشفقة
وترسم لينا ملامح تتشبه منا بزاف
تيبدا كلشي
ملي القصيدة تتحفر موتها فينا
و تشد علينا حق الألوان
تيبدا..
بخطوة نعاودو بيها التعازيلة
خطوة تديك لخطوة
نحلو الدائرة ونخليو الفكرة تكفر بلي كانت لينا
تكبر،تتكبر علينا
تصغار حتى تآمن بلى البداية نقطة هربات من بداية أخرى م كانتش غادي تكون
خطوة..
نطفيو بيها الضو..
نعفطو على خطوات طايحة مع عكاز تحت إضاءة عاكرة
نخلطو الملامح مع الظلام ف زنقة عندها رئة وحدة
خطوة..
ف الصغر تمنينا حياة تكون بحال شي ملعب كبير
كرة يكون عندها souffle كبر من الستة تاع العشية
و Tactique م يكونش عندو قلب
خطوة..
التراب عمرو توجع
حنا لي عجبنا لوجع و فاض منا قطرات
غرقنا و هو رجع
نهاية السير
طريق منحرف
وجه ف وجه
الشوفة طول من لعمر
حنا لي حياتنا كلها Montage
المشهد لي مقاد خاصو يعواج
وجه..
م يهمش ف الصورة تبان
م يهمش ملامحك تكون عندها شلا بيبان
انت دابا واحد موحد/ فيك / شحال من ألوان
وجه..
م يهمش ترسم بسمة خارجة على الإطار
م يهمش تريب الجدار
انت دابا واحد بينك و بينك
وجه..
م يهمش تكون Comparse ف مشهد انت الوحيد لي فيه
م يهمش تكون وسط بزاف منك
انت دابا واحد لي ف عينيك
Gros plan..
الدائرة سيناريو يمكن يكون مفتوح على كلشي،الممثل الوحيد لي قادر يلعبو ب Tactique باقي ساد عليه تحت إضاءة عاكرة ،يمكت الحياة تكون عندها الجرأة و تخلق منو مشهد رائع، ويمكن كاع يكون عندها رأي أخر و تخليه ف نقطة البداية لي هي بداية م قدراتش تنقز راسها و ما غاديش تنقز بيه.
الدائرة اختيار،يمكن الممثل يلعب فيها و يمكن كاع يختار يخرج للهامش و يلعب بجنب حيط، حدا garage,، وسط نافورة، فوق حمار، بالليل و لا النهار،بجمهور ولا بلا جمهور المهم يكون عندو اختيار تيشبه الملامح لي رسمها بطرف تاع الفاخر، و طرف من الطباشير
الدائرة قرار،لي بقى لداخل غا يعيش بلا شوار، و لي اختار يخرج يلبس brodequin militaire و يسلف من عند joker وجه م تيآمنش بالملامح.
......
......
