الكاتب: محمد لمسيح أبو سارة
شذرات من ديوان -رقصة الكاس-
- 1 -
ها القصيدة كتتوَجّع
بين كاس
اوراق بيضا
و قلم فـﯖـعان.
و الشاعر مشى ما رجَع
يمكن ما مسوّقش
يمكن هنا كان.
- 2 -
يا اللي ب كذبة فرحان
يا من ف وَهْمو جايل
شكون عَرَّاك و ادَّى الدزَّة؟
الطريق مـﯖـادَّة ميزان
و انت ماشي مايل
انت ما.. شي.. ما تَّا وزَّة.
- 3 -
ﯕـال لي كاسي
عوم فيَ
تشوف الگمرة شاعلة ب نهار
ﯕـلت له يااا وناسي
لاش المحنة
وانا الـﯖمرة عندي ف الدار
- 4 -
هذاك اللي كنشوف ف المرايا
ماشي أنا
و لو كان بلا عيوب.
هذاك مماثل ل"أنا"
أو ﯕول
أنا بالمقلوب.
....
- 5 -
شفت الكون ف مراية الدات
ب نظرة مخطوفة
بان لي جواك
. نقطة ما كايناش
و لما النظرة ب كاسي توضات
تبدلت الشوفة
و بانت أناك
. ف المراية ﯕـداااش
- 6 -
شحال هربت أنا من روحي
و الروح عسل خاتر
حتى ذبت أنا ف روحي
عاد حلات الخاطر.
- 7 -
موت و حياة
لاقاهم الضباب
خارج سرب الحكاية
الاولى نية
و الثانية سباب
سولوا البحر
فاش كان مراية
......
- 8 -
راهم مضّاو.... اقلامهم
ظنوا القصيدة ق..بة
جابوا و ادّاو... ف اوهامهم
بردوا ف القصيدة الرغبة
راهم ارماو.... كلامهم
و بقات القصيدة عزبة.
- 9 -
يا ذاك القاطع الزي
و مهجج علينا الانوار..
ايلا انت مول الري
شكون يكون مول الشوار؟
....
.....
