لالة مولاتي لقصيدة

الكاتب: ياسر صلاح حير

لالة مولاتي لقصيدة

الندهة عليك

من زمان و شلا يام

سلبتني حروفك ...

 وسلبني خيالك

و من نجوم الليل نرسم ليك

قصيدة ..

نرسم ليك تنهيدة ..

و شلا كلام.

الندهة عليك ..

من صهد لعوافي

من رعد صمايم لفيافي

من شهد لقلم و لقوافي

تخاويني ... و نخاويك

ترسميني سؤال

ونرسمك قصيدة و نظام

الندهة عليك ..

يا جواب بألف معنى

ياهدية من لعلالي و ذيك السما

غيبيني فيك

و نغيب ليك

و من حرڴة لڴليب  .. و عكاز لحبيب

نجيك بلا عساس بلا رقيب

بلا تسوال نسول فيك و فيا

و من دار كية  لبهوت نجيك..

لابساني حروف

ولابسك دربالة خوف

ياك لقراح تجي ب ضرة

ياك لفراح تجي ف مرة

وراس المحنة ف بياض الشيب محماه.

الندهة عليك

من طلة فجر الغايب

من دهشة لفراق

وصحاب النفاق

وما شاط مني

و ما شاط منك

وليل لمصايب يمكن جا بلا حساب

يمكن اجفى كل لحباب

وشمر عل لنواح ..

بكات ذيك لقصايد

 ندبت  احروفها

على سعدها..  و تفقصت بلغدايد.                

الندهة عليك..

من فڴدة زايدة

من كبدة زاندة

بجمار ذيك الشمس الڴادية

وعتو ب ذيك الحبات الزاهية

أنا الناديك يا عطفات الحال

سڴمي سعدي الميال

وروفي بجودك عل عطبات معذباني

عل سروت المجبد

و مكاحل تزند

مزاوڴة ف مول النخلات

مول لمحنيات بلا حناني

الصابغات الشعر قطران و كافور

 دفوع و تفكور..

و كبال مول السناسل العاطبني

الوافي فيا

المرشوڴ شوقو ف ڴليب اهل الحال

مرشة و ورد

ما بحالو ف رياض ما بحالو ف أرض.

الندهة عليك..

ف تعداد " البشير "

ف هدات لمقص و البندير

ويلا ساح شي مني فيك

وفاضت لقوافي منك فيا

تديرها ليام

و شلا تخمام

و مولات الواد .. لمهبلة لولاد

الطايحة مني ف صخرة

عيونها فايضة من لقصب و عين الشعرة.

07جع

الندهة عليك آمولالالالاتي لقصيدة.

                         ياسر صلاح حير                                                                                                                                                                                                  

............