أنا مانْسِيتْ

الكاتب: محمد موتنا السباعي

أنا مانْسِيتْ ..

يا داتِي ٱلْمَطْعونَه بْ شَلَّه سْكاكَنْ

شِي مَنْها بايَنْ وْ لَكْثِيرْ مَنْها خافِي

يا داتِي ڭاعْ لا تْخافِي

باقَه حْروفْ لَمْحايَنْ

باقَه حْرُوفْ لَجْرُوحْ

كُلّْ حَرْفْ مَنْها كامَنْ

مَحْفورْ فْ مَرْمَرْ ٱلرٌّوحْ

تَمّاكْ راهْ يَتْسايَنْ

وَقْتاشْ يْجِي وَقْتْ ٱلْبُوحْ

ماشِي باشْ يْحاكَمْ

وَ لا باشْ يَفْضَحْ وْجُوهْ

لِيها وْجُوهْ ٱخْرى فْ خْوافِي

ماها فْ ٱلْعُمْقْ خْواضْ

عُمْرُه ما كانْ صافِي

لَكِنْ باشْ يْخَلّي حْروفِي

تَدْعِي لِيها بْ لَعْفُو

وَ تْڭولْ لِيها : الله يْشافِي !

........                                                                                                                                                                                   

(من ديوان " القلب وما يريد ")

محمد موتنا السباعي