معزاوين

الكاتب: مصطفى الزيــن

معـــزاويــن

مَـازَالْتْ عْصاةْ الرَّاعي تضْربْ جلْدْ الْمعْزَه

فگاشُوشْ الطّْبلْ

ومَازالْتْ للاَّ غِيطَه تطَّرْجمْ غْواتْ الْمعْزَه عَيْــطَه

صَادْحَه فْ گْرُونْ الْجْــبلْ

وانْتومَا، يَادوكُ الْفتْيانْ ، الجْدْيانْ !

يَـا الرَّاقْصِينْ ، النَّاشْطِينْ مزْيــانْ !

وانْتَا ، يا ذاكْ الْعَتْرُوسْ ، يَا الْمتْعوسْ!

يَا الرَّاكبْ فُوگْ العَمَّارًِية -زعْماتكْ- عْـرُوسْ!

واشْ مَاشدَّاتْشْ جْلُودْكُمْ شِي تْبورِيشَه

منْ غْواتْ لمِّيمَه الْمعْزَه لعْزِيزَه لَلاَّ عِيشه؟

عَاجْبَاتْكُومْ الشّْطحَه والرّدْحَهْ وَالرّكْزَه

شُوفُو!، وا شُوفُو، جْناواتْ الدّْبِيحَه والسّْلِيخَه

آشْ سَايْرَه دَايْرَه فِيكُمْ عِيطَه

منْ جلُودْكُمْ - منْ بَعْدْ جلْدْ الْمعْزَه -ارَاهْ ينـضبَرْ ويهْضَرْ

گاشْوشْ عَمّْكُومْ الطّْبلْ

والْغِيطَه مَا تْعودْ تردّْدْ ..

ما تْرِيــدْ تمـــدّْدْ..

اصْواتْ غْواتْكُمْ عِيطَه

حِيتْ نْسِيتُو، يَـا منْ سْهِيتُو ، غَـزَّهْ

امْجادْ الْعزَّه ..

ما تْلاتْ تفزّْكُمْ فـزَّه

هزَّاتْ رعُودَاتْ وبرُوقاتْ

السَّهلْ الْوَادِي

يَا الْغَادِي منْ گرونْ الجْبلْ.

الاثنين-24 يونيو 2024.