الكاتب: أحمد لمسيح
جرَّبْتْ نفيق منِّي لقيتْ ورقة
-1-
نورك حجاب
باش نشوف يلزمني نعمى ،
نسافر في عمايَ
نكتب حلمة
و خايف نطيح منها في مراية " الواقع " .
-2-
نبقى طاير " بين وبين " و لاقبر يتسنّاني
.........
غرتْ من ظلي – نْـزق
سبقني للسـر .
-3-
إذا ملكتيني وتَّـمْـحيت في الضو
خلي شي حريفات منّي في الظل
نتبَّـع أثرك حتى نوصل لجنتك ودفنيني .
-4-
ورقتي ..... ماعنديش
ما عنديش ورقتي .....
راني حروف معلْـقة والمداد خافي .
وقتاش ورقتي تصبغ خيالي بسرها ؟
نلقى فيها جناحي
ونرسم سمانا .
-5-
عصفت لرياح وكتفت السحاب
خلات الحيرة موال الفيضة
وعين الكلام مزمومة بالصم
مخبلة الحروف الشاردة .
-6-
فكرتْ وغرقتْ في حبال النية
......
جربتْ نفيق منّـي لقيت الورقة تدحيني للصمت
والمداد جافل
تخيَّـل راسو إيزار ساتر الورقة بدموعو
يبكيوْ عليَّ مدفون بلا حروف .
-7-
ما لقيتْ ما " أحن " من الورقة
ولا أقسى من ورقة
ولا أصبر من ورقة
ولا " أكتم " من ورقة
ولا أصفى من ورقة
ولا سر غامض بحال ورقة
ولا " أجمل " من ورقة مبتسمة .
......
