ورقة اكبر من نيتي

الكاتب: أحمد لمسيح

ورقة اكبر من نيتي

يا ورقة أنا نحكي وانتِ حكمي

............
وتسلَّفت شوية من الوهم - خلَّطتو بالذكريات
وحرَّمْتْ على راسي نكون " صدى " .
خرجَتْ من جنابي الحيرة  تتبختر 
وسلمت نوبة الشطحة  للسحابة
قالت لها ملْكيه .
وانا مغشوش نتسنى لفكاك بانت لي قصيدة تشالي 
وصورتها بسمة .
............
طارت موجة – حضنْتْ عليها ووليت رمل 
طاح ما عْلى وخْفـى ف الرمل  .
سنَّدت على غنايتي في هبالي 
سندت على نواح لمواج  في ليل بهيم 
وقصبتي تنادي : الورقة بحر ، الورقة بحر .
.............
عاتر في رملي نتسنى من البحر قصيدتي تظهر .  
..............
..............
..............................................................................

العشاء الأخير مع ورقة  ولا خائن 
 
- 1 – 
سكـنَـتْـني ورقة – قالت أنا منفاك ،
                            أنا صليبك .
تدلِّيت دمعة -  تتسارى على شاعر يلبَّـسْها " حجاب البلاغة " .
مرة مع فراشة ، مرة مع عصفورة ، مرة مع بسمة ، مرة مع موجة  ، مرة مع سحابة ،
مرة مع والو ........
في كاسي تشق / مال مافيه  في دوايتي .
غاطسين حروفي فيها  يتسنّاو  ورقة تحضنهم 
وينكرو واش أنا مولاهم .
- 2 – 
يا ورقة  قرايني نعترف لك ،
ياورقة سمعيني خليني نبوح 
نرجاك .
دمي مداد يسعاك 
صدقي عليه بسمة ،
رشي  قبره برضاك 
دفني  حلمي في جواه  .
- 3 –
جربت نقنع  ورقة بهبالي  و.... تَّـمحيت 
نسات الورقة سري ،
تسلْطْنَت  ومنها شاع رمادي .
.............
غَرْت من فرحي بها  وهي مشيعاني  لقبري
 .............................................................................
 
 
ورقتي تنبغيك 
 
حلال  علي َّ  نموت مستور  بالكلام 
والورقة قبر – تنوَّر سرّي 
تهديني عمر .
أش ندير بالحماق وهو  عندي نرعاه  ؟
بين  و  بين  كنت راكن .
ما بغيتش المداد يوسَّـخ  الورقة  إيلا  ماكتبش :
أنا تنبغيـك
..............................................................................

ورقة اكبر من نيتي 
 
علمتني ورقة نكتب من جديد 
واجهتني : واش قادر تغامر ؟
زعزعاتني  ( ...... )
تَّـطويت  في  نيتي 
طلَيْتْ  عليَّ مدادي ،
مشيتْ  في غابة الكلام " كاموفلي " 
وحصلوني شي مجازات – عكلوني .
..............
..............
رجعتْ  منين بديتْ ،
سولتني البلاغة : أش بغيت ؟
حشمتْ .... وعلى نفسي تْـخبِّيت .
....
...
...