الكاتب: سعيد با الزين جيداني
جرب تموت
جرّب تموت
و غَ بلعاني ضاحوكي
دير موتة الحمار زعمة
و شوف...
من تحت الكفن
سجل فيديو ب الفن
أصدق فيلم غ تشوفو ف حياتك
صورة و موت
شوف
شحال من شوفة غ تشوفك
و سجل الطوندونس
شوف...
شكون حداگ ف جميع الوراق
شكون أحسب العواد ف التفراق
شكون بكا من نيتو...
حرّ الفراق
شوف...
بنص عين و حضي إلا يشوفوك الخوت
شوف..
شكون ب الزربة خلٌط العجنة
شكون تسناك تبرد
شكون زرٌد
شوف..
شكون مسح نجمتك.
غمٌض عينيك على سمانا
ونٌا ماك جهة مانا
شوف...
الغسّال ملي شاف وسخك
آش گال؟؟؟
شوف...
شحال من جوف سخنوه اللُگمات
شوف ...
شكون من ليلتك كذب عليك
شوف...
واش الميت نيت كيتعذب بالغواث
شوف...
ذوك اللي گلتی أنت ك يبغوك
واش ف الگنازة شيعوك
شوف...
شكون قبّلك
شكون قبّرك...
و وقف يترحم عليك
شوف...
واش الدود عزيز عليه الموت
و لا غ يعافك كيف عافوك الخوت
شوف...
أما أكثر واش عذاب القبر
و لهاد عيشة الزمر
أحسب أصباع يد اللي غمضت عينيك عل الدنيا
شوف...
سجل...
أحسب...
حس.
و رد عليّ أنا الميٌت جنبك الأخبار
.....
.....
