اعطيني يد ثالثة

الكاتب: سعيد بلهواري

اعطيني يد ثالثة

الاولى مغلوله..

الثانية مشلوله..

ايلا بيبان الحق محلوله..

اعطيني يا لعالي يد ثالثه،

ماشي باش نرسم..

سحابه و بحر..

ولا باش نرسم..

غابه بلا شجر..

و شمس تشرق من ثاني.

ماشي باش نحلم..

بعرس و فحر .

و لا خضوريه تنضر..

ف الكف الزايده بلا حناني.

اعطيني يد ثالثه..

واقطع من خطواتي اللي فاتوا رجل،

خلي الاولى ثابته..

و قول ل خيالي :

ايلا نسميك ماضي..

و مزغرته عليك الاوقات..

قطع الواد،

وقبل لا ينشفوا دموعك..

"..ارحل !".

اعطيني يد ثالثة..

ماشي باش نمسح..

دموع على خد لعقل،

و لا باش نفتل..

من خيوط الريح حبل،

و نمدها قربان..

كلما الظلام بان .

ل إله الظل.

اعطيني يد ثالثة..

ماشي باش نخبل..

خشبات الصليب..

و نتلف الموت عل الطريق،

و لا باش نحل..

باب الجنه ب صفعه على وجه لبحر..

و نقول ل راسي فيق..!

اعطيني يد ثالثه..

باش نكمل هاذ لخطوط،

نزيد عين على جبين المينوط،

و نقول لطوير جاي..؛

ف يومه الواحد و العشرين :

"هرس قشور البيضه..

مد عنقك ل سيف لقصيده..

و على قفصك الجديد طل..!"

اعطيني يد ثالثه..

و رابعه..و خامسه..و ساته..؛

جوج نخليهم مفتوحين ليك؛

باش دعايا يوصل.

و ثلاثه ل الشبيك..

و الساته نخليها ل لقفل.

.........

........                                                                                                                                                                

--سعيد بلهواري--